Now loading...
വിയറ്റ്‌നാമിലെ ഇലക്ട്രിക് വാഹന നിര്‍മ്മാതാക്കളായ വിന്‍ഫാസ്റ്റ്, ഇന്ത്യയില്‍ തങ്ങളുടെ ഉല്‍പ്പന്നം അവതരിപ്പിക്കുന്നതിന് മുന്നോടിയായി ഇലക്ട്രിക് ചാര്‍ജിംഗ്, വില്‍പ്പനാനന്തര പരിഹാര ദാതാക്കളായ റോഡ് ഗ്രിഡുമായി പങ്കാളിത്തത്തില്‍ ഏര്‍പ്പെട്ടതായി റിപ്പോര്‍ട്ട്.
വിന്‍ഫാസ്റ്റ് ഇന്ത്യയില്‍ ഉല്‍പ്പന്ന ലോഞ്ചിനായി തയ്യാറെടുക്കുമ്പോള്‍, രാജ്യവ്യാപകമായി പ്രാപ്യത, വിശ്വാസ്യത, ഉപഭോക്താക്കള്‍ക്ക് സൗകര്യം എന്നിവ ഉറപ്പാക്കുന്നതിന് കമ്പനി ശക്തമായ അടിത്തറ പാകുകയാണ്. റോഡ്ഗ്രിഡുമായുള്ള പങ്കാളിത്തം ഈ ശ്രമത്തിന്റെ ഭാഗമാണെന്ന് കമ്പനി പ്രസ്താവനയില്‍ പറഞ്ഞു.
കൂടാതെ, ഇന്ത്യയിലുടനീളമുള്ള വില്‍പ്പനാനന്തര പ്രവര്‍ത്തനങ്ങള്‍ വര്‍ദ്ധിപ്പിക്കുന്നതിനായി റോഡ്ഗ്രിഡ് ഉള്‍പ്പെടെ സാധ്യതയുള്ള സേവന ദാതാക്കളുമായി സേവന വര്‍ക്ക്ഷോപ്പുകള്‍ സ്ഥാപിക്കാനും ലക്ഷ്യമിടുന്നതായി കമ്പനി അറിയിച്ചു.
‘ഒരു ഇലക്ട്രിക് വാഹനം സ്വന്തമാക്കുന്നത് കഴിയുന്നത്ര എളുപ്പവും അനായാസവുമാക്കുക എന്നതാണ് ഞങ്ങളുടെ ലക്ഷ്യം. റോഡ്ഗ്രിഡുമായി കൈകോര്‍ക്കുന്നതിലൂടെ, ഇന്ത്യയിലെ ഓരോ വിന്‍ഫാസ്റ്റ് ഉപഭോക്താവിനും വിശ്വസനീയമായ ചാര്‍ജിംഗും സേവനവും ലഭ്യമാകുന്നുവെന്ന് ഉറപ്പാക്കാന്‍ കഴിയും,’ വിന്‍ഫാസ്റ്റ് ഏഷ്യ സിഇഒ ഫാം സാന്‍ ചൗ പറഞ്ഞു.
ഈ വര്‍ഷത്തെ ഉത്സവ സീസണിന് മുമ്പ് വിഎഫ്7, വിഎഫ് 6 മോഡലുകള്‍ ഇന്ത്യയില്‍ അവതരിപ്പിക്കാനാണ് കമ്പനി ലക്ഷ്യമിടുന്നത്.
തമിഴ്നാട്ടിലെ തൂത്തുക്കുടിയില്‍ നിര്‍മ്മാണ പ്ലാന്റ് സ്ഥാപിക്കുന്നതിനായി വിന്‍ഫാസ്റ്റ് 500 മില്യണ്‍ യുഎസ് ഡോളര്‍ നിക്ഷേപിച്ചു. 2025 ന്റെ രണ്ടാം പകുതിയുടെ തുടക്കത്തില്‍ ഇത് പൂര്‍ത്തിയാകുമെന്ന് പ്രതീക്ഷിക്കുന്നു.
വരും വര്‍ഷങ്ങളില്‍ രാജ്യത്തെ വാര്‍ഷിക വൈദ്യുത വാഹനങ്ങളുടെ ഉത്പാദനം 1.5 ലക്ഷമായി ഉയര്‍ത്താനും മിഡില്‍ ഈസ്റ്റിലെയും ആഫ്രിക്കയിലെയും രാജ്യങ്ങളിലേക്ക് അവ കയറ്റുമതി ചെയ്യാനും ഇത് ലക്ഷ്യമിടുന്നു.
Jobbery.in
Now loading...
