Now loading...
വിവിധ മേഖലകളില്‍ നിന്നുള്ള 250 ദശലക്ഷത്തിലധികം തൊഴിലാളികള്‍ ബുധനാഴ്ച നടക്കുന്ന രാജ്യവ്യാപക പൊതു പണിമുടക്കില്‍ പങ്കെടുക്കുമെന്ന് സംഘാടകര്‍. പത്ത് കേന്ദ്ര ട്രേഡ് യൂണിയനുകളുടെ ഫോറം സംഘടിപ്പിക്കുന്ന പണിമുടക്ക് കേന്ദ്രത്തിന്റെ ‘തൊഴിലാളി. കര്‍ഷക വിരുദ്ധ, കോര്‍പ്പറേറ്റ് അനുകൂല നയങ്ങള്‍ക്ക്’ എതിരെയാണ്.
രാജ്യത്തുടനീളമുള്ള കര്‍ഷകരും ഗ്രാമീണ തൊഴിലാളികളും പ്രതിഷേധത്തില്‍ പങ്കുചേരുമെന്ന് അഖിലേന്ത്യാ ട്രേഡ് യൂണിയന്‍ കോണ്‍ഗ്രസിലെ (എഐടിയുസി) അമര്‍ജീത് കൗര്‍ വാര്‍ത്താ ഏജന്‍സിയായ പിടിഐയോട് പറഞ്ഞു. വലിയ തോതിലുള്ള പണിമുടക്ക് അവശ്യ, പൊതു സേവനങ്ങളെയും ബാങ്കിംഗ്, കല്‍ക്കരി ഖനനം ഉള്‍പ്പെടെയുള്ള പ്രധാന വ്യവസായങ്ങളെയും തടസ്സപ്പെടുത്താന്‍ സാധ്യതയുണ്ട്.
സമ്പദ്വ്യവസ്ഥയുടെ എല്ലാ മേഖലകളിലും വ്യാപകമായ സമരത്തിനുള്ള ഒരുക്കങ്ങള്‍ സജീവമായി പുരോഗമിക്കുകയാണെന്ന് ഫോറം പ്രസ്താവിച്ചു.
പണിമുടക്ക് അവശ്യ സേവനങ്ങളെ സാരമായി ബാധിക്കും. ബാങ്കിംഗ്, പോസ്റ്റല്‍ സര്‍വീസസ്, കല്‍ക്കരി ഖനനം, ഫാക്ടറി പ്രവര്‍ത്തനങ്ങള്‍, സംസ്ഥാന ഗതാഗത സേവനങ്ങള്‍ തുടങ്ങിയ പ്രധാന മേഖലകളെ ഇത് ബാധിക്കുമെന്ന് ഹിന്ദ് മസ്ദൂര്‍ സഭയിലെ ഹര്‍ഭജന്‍ സിംഗ് സിദ്ധു സ്ഥിരീകരിച്ചു.
ഐഎന്‍ടിയുസി, എഐടിയുസി, എച്ച്എംഎസ്, സിഐടിയു, എഐയുടിയുസി, ടിയുസിസി, എസ് ഇഡബ്‌ളിയുഎ, എഐസിസിടിയു, എല്‍പിഎഫ്, യുടിയുസി തുടങ്ങിയ സംഘടനകളാണ് പണിമുടക്കിന് നേതൃത്വം വഹിക്കുന്നത്.
കഴിഞ്ഞ വര്‍ഷം കേന്ദ്ര തൊഴില്‍ മന്ത്രി മന്‍സുഖ് മാണ്ഡവ്യയ്ക്ക് 17 ആവശ്യങ്ങള്‍ അടങ്ങിയ ഒരു ചാര്‍ട്ടര്‍ സമര്‍പ്പിച്ചതായി തൊഴിലാളി യൂണിയന്‍ ഫോറം ഒരു പ്രസ്താവനയില്‍ പറഞ്ഞു. എന്നാല്‍ സര്‍ക്കാര്‍ അവരുടെ ആശങ്കകള്‍ പരിഹരിക്കുന്നതില്‍ പരാജയപ്പെട്ടുവെന്ന് അവര്‍ ആരോപിക്കുന്നു. കഴിഞ്ഞ ഒരു ദശാബ്ദക്കാലമായി വാര്‍ഷിക ഇന്ത്യന്‍ ലേബര്‍ കോണ്‍ഫറന്‍സ് നടത്തുന്നത് സര്‍ക്കാര്‍ അവഗണിക്കുന്നു. സര്‍ക്കാര്‍ തൊഴിലാളി വിരുദ്ധമായ തീരുമാനങ്ങള്‍ എടുക്കുന്നുവെന്നും അവര്‍ ആരോപിക്കുന്നു.
സര്‍ക്കാരിന്റെ സാമ്പത്തിക നയങ്ങളെ വിമര്‍ശിച്ചുകൊണ്ട് ഫോറം, അവ തൊഴിലില്ലായ്മ വര്‍ദ്ധിപ്പിക്കുന്നതിനും അവശ്യവസ്തുക്കളുടെ വില കുതിച്ചുയരുന്നതിനും വേതനം കുറയുന്നതിനും കാരണമായതായും അവകാശപ്പെട്ടു.
Jobbery.in
Now loading...